Кавадаречки Тиквеш продолжува со засилувањата за сезоната 2025/26 и официјално го претстави своето ново име – нигерискиот офанзивец Сандеј Алими.
25-годишниот Алими игра на десната крилна позиција и важи за брз и продорен фудбалер. Последно настапуваше за нигерискиот клуб Шутинг Старс, а пролетната полусезона ја мина без клуб. Во својата кариера имал интернационални искуства, настапувајќи за Галатасарај (U21), португалски Авес, турски Ескишехирспор и грчка Кавала.
Сепак, патот на Алими не беше секогаш лесен – по заминувањето од Турција имаше неколку подолги паузи без клуб, но секогаш успеваше да се врати на теренот. Сега, со нова мотивација, ќе се обиде да ја врати формата и да донесе офанзивна свежина во редовите на Тиквеш.
„Со голема чест и задоволство ви го претставуваме нашето ново засилување – Сандеј Алими! Играч со искуство, борбен дух и голема желба за успеси, кој ќе донесе нова енергија и брзина во нашиот тим,“ порачаа од клубот.
Тиквеш новата сезона ја отвори со реми без голови (0:0) против Работнички, а кавадарчани се надеваат дека токму Алими ќе помогне во зголемување на ефикасноста во нападот.
