Македонскиот фудбалски шампионат стартува со спектакл! На 8 август, во рамки на првото коло од Првата македонска фудбалска лига (ПМФЛ), на Националната арена „Тодор Проески“ ќе се одигра големото вечно дерби меѓу Вардар и Пелистер.
Раководството на скопски Вардар, актуелен освојувач на Купот на Македонија, веќе ги пушти во продажба билетите за овој натпревар. Цената на билетот изнесува 300 денари, а може да се набави преку официјалната продажна мрежа „МкТикетс“.
По елиминацијата од Конференциската лига од страна на Лозана, „црвено-црните“ целосно се насочуваат кон предизвиците во ПМФЛ, каде што ќе атакуваат на врвот. Стартот нема да биде лесен – вечниот ривал од Битола доаѓа во Скопје во обид да направи изненадување и да впише победа уште на самиот почеток.
Натпреварот меѓу Вардар и Пелистер се игра во петок (8 август), со почеток во 20:00 часот, под рефлекторите на најголемата македонска фудбалска арена.
