На отворениот базен „Атина Бојаџи“ во Охрид викендов се одржа петтото издание на Меѓународниот пливачки митинг „Охрид Опен 2025“, во организација на Пливачкиот клуб „Акваспирит“ – Охрид, со поддршка од Општина Охрид. Турнирот прерасна во вистински пливачки спектакл, кој ја потврди улогата на Охрид како центар на пливањето во Македонија и пошироко.
На митингот учествуваа над 220 пливачи од 25 клубови од земјата и странство, кои се натпреваруваа во девет дисциплини и пет возрасни категории. Под високи летни температури, но и со голема спортска амбиција, беа доделени вкупно 246 медали и 12 пехари за најдобрите поединци и категории.
„Во базенот секој метар е борба со времето, со себе, со границите што вчера изгледаа недостижни. Но токму тука, во тие води, се раѓаат шампиони. Зад секој успех стои тренер кој верувал, организатор кој вложил и спортист кој одбрал да не се откаже. Може резултатите ќе избледат, но карактерот што се гради во вакви моменти останува засекогаш“, истакна претседателот на Советот на Општина Охрид, Перчо Божиновски, на отворањето на натпреварувањето.
Домаќинот, Пливачки клуб „Акваспирит“ – Охрид, настапи со 75 натпреварувачи кои покажаа високо ниво на подготовка, борбеност и спортски дух. Особено внимание привлекоа најмладите членови на клубот, за кои ова беше прво учество на меѓународен митинг – искуство кое, покрај натпреварувањето, носи вредни лекции за тимски дух, упорност и посветеност.
„Акваспирит“ блескаше со освоени 19 медали и два пехари за најдобри пливачи во своите категории. Истовремено, митингот не беше само спортски настан, туку и симбол на визија и вложување во иднината на македонското пливање.
Организаторите изразија огромна благодарност до сите клубови, тренери, судии, волонтери и родители кои дадоа свој придонес во реализацијата на турнирот, како и до Општина Охрид и ЈП „Билјанини Извори“.
Пливачки клуб „Акваспирит“ од Охрид продолжува да ја гради својата успешна приказна во македонското пливање. На престижниот меѓународен митинг „Охрид Опен 2025“, кој викендов се одржа во олимпискиот базен „Билјанини Извори“, охриѓани остварија извонреден резултат – вкупно 19 медали, од кои 11 златни, 1 сребрен и 7 бронзени, како и 2 пехари за најдобри пливачи во возрасните категории.
Златни медали (11):
Анастасија Цветаноска – 6 златни медали
Ања Гуџоска – 4 златни медали
Ведран Томчов – 1 златен медал
Сребрен медал (1):
Елена Грмашкоска
Бронзени медали (7):
Јана Мише – 2 бронзи
Предраг Мургоски – 2 бронзи
Ведран Томчов – 1 бронза
Елена Грмашкоска – 1 бронза
Јана Грмашкоска – 1 бронза
Дополнително, Ања Гуџоска (категорија 2008 и постари) и Анастасија Цветаноска (категорија 2009/2010) се закитија со пехари како најдобри пливачи во своите возрасни категории, што е големо признание за нивниот континуиран напредок и квалитет.
Со овие резултати, „Акваспирит“ уште еднаш докажа дека има силна база на млади и талентирани пливачи кои достојно го претставуваат клубот и градот Охрид на пливачката сцена.
Пливачкиот клуб „Акваспирит“ – Охрид најави дека ќе продолжи со уште поголема мотивација и посветеност во својата мисија – да гради иднина за пливањето во Македонија.
