Третолигашот Пчиња ќе земе учество во фудбалскиот Куп на Македонија, што ќе претставува голем историски успех за овој клуб.Екипата која настапува во Трета лига – Север за првпат во клупската историја ќе настапи во Купот на Македонија и со тоа ќе се испише една голема историја за клуб кој доаѓа од едно мало село како што е Пчиња.
Кумановското село кое има околу 650 жители ќе има можност да го проследи својот миленик и да навива за истиот во Купот на Македонија.
Пчиња важи за клуб кој е одлично организиран, клуб кој има одлично поставени темели и минатата сезона имаше одлична сезона во Трета лига – Север, а сега оди чекор повеќе со учеството во Купот на Македонија.
Како што вели претседателот на клубот Боби Маневски за Спортска Мрежа, посакуваат за противник да добијат прволигашка екипа со цел да одиграат квалитетен натпревар и да добијат искуство, кое за мала екипа како Пчиња ќе биде добредојдено.
