Со прв работен состанок помеѓу управата, стручниот штаб, медицинскиот тим и комплетниот ростер на ракометари, официјално започна новата сезона за Еурофарм Пелистер 2. Тимот кој по една сезона се врати во Суперлигата ги започна активностите за натпреварувачката 2025/26 година.
Во салата „Боро Чурлевски“ во Битола беа присутни сите ракометари, освен младиот голман Иван Младенов, кој е дел од македонската кадетска репрезентација на Европскиот младински фестивал во Скопје. Тој ќе им се приклучи на подготовките во Пехчево од понеделник.
Тренерот Александар Зарков го предводеше воведниот собир, при што беа претставени новите засилувања и деталниот план за претсезонските подготовки.
Еурофарм Пелистер 2 ќе се потпира на мешавина од млади таленти и играчи со искуство, а во составот се приклучија Славчо Шулески и Јован Даневски од Тиквеш, Јапонецот Баптист Одифред од Даипо Стип, Илија Илијевски од Вардар Неготино, како и неколку млади имиња од погонот на Еурофарм Пелистер – Мелин и Алдин Фехми, Иван Велески, Леонид Лозановски, Лука Ѓорѓиевски, Андреј Дамчевски и Стефан Лазаревски.
Клубот се раздели со Василије Печурица, Богдан Мијушковиќ, Никола Блажевски, Марко Димовски и Дејан Југовски.
По почетната фаза во Битола, тимот ќе се пресели на подготовки во Пехчево, а финалниот дел од претсезоната ќе вклучи серија контролни натпревари и настап на меѓународниот турнир „Миле Нешкоски“ во Прилеп (21-24 август), каде Пелистер 2 ќе игра во група со Пролет и српската Црвена Звезда.
Еурофарм Пелистер 2 влегува во новата сезона со целосно подготвен тим, јасна визија и амбиција за успешно враќање меѓу најдобрите во македонскиот ракомет.
