Второлигашот Детонит Плачковица го гради ростерот за новата сезона во Втората лига, а во која радовишкиот тим одново ќе го води искусниот штипски стратег Горан Здравков.
Денес Детонит Плачковица ги започна подготовките за новата сезона, а на првиот ден од подготовките беа претставени и две засилувања.
Најзвучно засилување ќе биде искусниот Сашко Дуков кој во Радовиш доаѓа од редовите на Кожуф од Гевгелија.
Се работи за искусен голгетер кој изминатите сезони е меѓу најдобрите стрелци во лигата, а минатата сезона беше најдобар стрелец за Кожуф, а пак претходната на Каменица Саса и благодарение на него „рударите“ го изборија опстанокот.
Минатата сезона Дуков го носеше дресот на Охрид во есенскиот дел и Кожуф во пролетниот дел и постигна 14 погодоци.
Низ својата кариера искусниот фудбалер покрај за Кожуф, Охрид, Каменица Саса има настапувано и за Силекс, Пелистер, Росоман, Вардар Неготино, Тиквеш, кичевски Напредок, а меѓународна кариера градеше во Београд.
Детонит Плачковица денес го претстави и Филип Ѓорѓиевски кој доаѓа од редовите на Кожуф, а се работи за 22-годишен дефанзивен играч од средниот ред.
Потекнува од школата на Вардар, беше дел од Тетекс, Кит Го од Пехчево, Скопје и последно Кожуф.
Радовишани ги започнаа летните подготовки, а во следните денови ќе следуваат уште неколку квалитетни засилувања. Клубот е финансиски стабилен со одличен буџет дознава Спортска Мрежа.
