Средниот блокер Филип Маџунков ќе му биде на располагање на селекторот Јошко Миленкоски за престојните квалификациски натпревари против Грција и Грузија во рамки на борбата за пласман на Европското првенство 2026.
Името на Маџунков е меѓу 16-те повикани одбојкари кои на 17 јули ќе ги започнат подготовките во Маврово. Тој ја пропушти првата летна репрезентативна акција поради интервенција на коленото, но по успешната рехабилитација се враќа во националниот тим.
Селекторот Миленкоски останува доследен на составот кој настапуваше во Европската Златна лига 2025. На списокот повторно се најдоа репрезентативците од шампионот Струмица 47&72 и освојувачот на Купот – Штип УГД, како и интернационалците браќата Ѓоргиеви, Љафтов, Савовски, Костиќ, Илиев и Ефремов.
Подготовките стартуваат на 17 јули и ќе траат десет дена во Маврово, по што од 28 до 30 јули ќе следи пријателска пресметка со Бугарија во Софија. Финалната фаза од подготовките ќе се одвива во СЦ „Борис Трајковски“ во Скопје, каде од 5 до 7 август ќе се одржи 49. издание на меморијалниот турнир „Бранко Хаџииљоски – Чајка“ со учество на Македонија, Бугарија и Швајцарија.
Првиот квалификациски натпревар Македонија го игра на 13 август во Атина против Грција, додека последниот меч од циклусот ќе се одигра на 17 август во Скопје, со почеток во 20 часот, против селекцијата на Грузија.
