Фудбалскиот клуб Шкупи го официјализираше ангажманот на 23-годишниот офанзивен играч за врска, Сухејл Мухарем. Играчот кој своите први фудбалски чекори ги направи токму во младинските категории на чаирскиот клуб, се враќа таму каде што започна неговата професионална кариера.
Во изминатите години, Мухарем ги бранеше боите на неколку македонски прволигаши, меѓу кои Ренова, Работнички и Струга Трим Лум, додека последните шест месеци ги мина во косовскиот Фероникели.
“Добредојде таму каде што сè започна, Сухејл Мухарем. Овие бои ги носеше со гордост. Замина како еден од нас. Сега се враќаш — не само како фудбалер, туку како дел од семејството. Приказната продолжува… и ова поглавје ќе биде уште посилно. Еднаш Шкупи, засекогаш Шкупи”, стои во објавата на клубот на социјалните мрежи.
Шкупи активно работи на засилување на ростерот ова лето, со амбиција да состави конкурентен тим и да го подобри пласманот во новата сезона од Првата македонска фудбалска лига.
