Новиот прволигаш Арсими официјално ги започна подготовките за новата сезона, а во која Арсими ќе биде дебитант во Првата македонска фудбалска лига.
Вчера на Градскиот стадион во Гостивар беше одржан првиот состанок и првиот тренинг со што и официјално беше означен почетокот на подготовките.
Од клубот истакнуваат дека фудбалерите и стручниот штаб се целосно посветени да работат и да темпираат формата со цел максимално подготвени да влезат во новата сезона.
„Нè очекуваат недели исполнети со напорна работа и посветеност, за да бидеме подготвени за предизвиците што доаѓаат“, велат од клубот.
Арсими минатата сезона заврши на второто место во Втората лига и обезбеди директен влез за историско учество во Прва лига.
Спортска Мрежа редовно информираше за клубот уште кога беше дел од Трета лига – Запад и од тогаш го претставувавме концептот и одличното работење на Арсими кое беше насочено кон влез во Прва лига, а тоа и се оствари. Во јуни 2022 година Арсими играше бараж за влез во Втора лига против Овче Поле од Свети Николе, кога го декласираше и од тогаш Арсими има константен раст и сега е дел од елитата.
