Започнаа подготовките на ФК Пелистер за новата сезона во Првата македонска фудбалска лига, првиот состанок и тренинг со играчите беше реализиран вчера на стадионот „Петар Милошевски“ во Битола. Новиот шеф на стручниот штаб, Димитар Капинковски, ја одржа првата прозивка и го означи стартот на новата етапа во историјата на клубот.
Пелистер влегува во нов проект под водство на новиот борд на директори, предводен од Александар Стефановски, додека со младинскиот погон ќе раководи искусниот Марјан Секуловски.
На првиот тренинг присуствуваа дел од фудбалерите кои имаат важечки договори со клубот, како и неколку имиња кои веќе ги продолжија соработките ова лето – меѓу нив се Александар Ристевски, Гроздановски, Миленковски, Трајковски, Наумоски и Керим. Најзвучното засилување за „зелените“ е повратникот Стефан Спировски, кој повторно ќе го облече дресот на битолскиот прволигаш.
Во меѓувреме, клубот се раздели со неколку играчи чиј договор истече: Дејан Ѓуриќ, Захар Тарасенко, Фернардо Брито Карваљо, Масааки Такахара, Бојан Спиркоски, Виктор Серафимовски, Даниел Карчески и Стефан Костов.
Во првиот тим се приклучени и тројца талентирани младинци – Јован Мрмарчевски, Андреј Мурговски и Ерџан Фејзуловски, кои ќе имаат можност да се наметнат во подготвителниот период.
Пелистер ќе ја одработи првата фаза од подготовките во Битола, а веќе е познат и планот за контролни натпревари. Првиот тест ќе биде на 12 јули против Струга Трим Лум, а потоа ќе следат пресметки со Трајал Крушевац (Србија), Егалео (Грција) и Охрид.
Новата сезона во Првата лига ќе стартува на 8, 9 или 10 август, а битолчани влегуваат со амбиција за стабилна и конкурентна кампања во македонскиот елитен фудбал.
