Македонскиот тенисер Обрад Марковски, во тандем со српскиот Никола Јовиќ, стигна до финалето на ИТФ М15 турнирот во Куршумлијска Бања, но не успеа да ја освои титулата. Во финалето беа поразени од третите носители – Николас Бруно од Чиле и Латуро Аугустин Фалабеа од Аргентина со 2-0 во сетови (7:6(5), 6:3).
Иако не успеаја да стигнат до крајната цел, за Марковски ова е многу значаен настап, имајќи предвид дека токму на овој турнир минатата година ја освои титулата. Повторното финале е показател за неговата стабилност и квалитет во играта на двојки.
Марковски и Јовиќ одиграа одличен турнир. Во првото коло ги совладаа Германецот Винсент Јохан Страуч и Јужноафриканецот Николас Ван Акен со 6:2, 6:2. Во четвртфиналето беа блиску до уште една сигурна победа – го добија првиот сет со 6:1, а во вториот водеа со 5:4 против Виктор Марков (Бугарија) и Амадор Салазар (Чиле), кога противниците се откажаа.
Во полуфиналето доминираа над чилеанската двојка Алехандро Банкалури и Бенџамин Игнасио Торес Фернандес, победувајќи со убедливи 6:1, 6:1.
Со овој настап, Марковски уште еднаш покажа дека има потенцијал за повисоки цели и дека заслужено е меѓу најдобрите македонски тенисери на меѓународната сцена.
