Екипата на Кадица избори пласман во финалето на Општинската фудбалска лига (ОФЛ) Прилеп, откако во полуфиналниот натпревар славеше со 2:0 против Кадино.
Натпреварот се одигра на Градскиот стадион во Прилеп, а резултатот беше отворен уште во 8. минута со погодок на Дарко Аврамоски, кој го постави почетното и полувремено водство од 1:0.
Во второто полувреме, Рубинчо Велески со гол во 66. минута ја потврди победата на Кадица, со што беше поставен конечниот резултат од 2:0.
Со оваа победа, Кадица се пласираше во финалето, каде ќе се соочи со екипата на Млекар. Финалниот натпревар за титулата во ОФЛ Прилеп ќе се одигра на 24 мај (сабота) со почеток од 16:00 часот, на Градскиот стадион „Гоце Делчев“ во Прилеп.
Победникот во финалето меѓу Кадица и Млекар покрај тоа што ќе биде шампион на ОФЛ Прилеп, ќе избори влез во Третата македонска фудбалска лига – Југ за следната сезона.
