Бутел Скопје вечерва направи изненадување откако во „Билјанини Извори“ го доби Охрид со резултат од 29:31 за прва победа во плеј-офот.
Во првиот дел Охрид имаше предност од 17:14, а во второто полувреме Бутел Скопје успеа да го сврти резултатот и на крај да триумфира.
Тренерот на Бутел Скопје, Горан Кузманоски во изјава за Спортска Мрежа истакна дека овој плеј-оф е шанса за младите играчи да растат од натпревар во натпревар, притоа направи и анализа на самиот меч ексклузивно за Спортска Мрежа.
„Искрено, ние во плеј-офот можеби важиме за аутсајдери затоа што за нас амбициите беа да се пласираме во плеј-оф, бидејќи пред сѐ имаме македонска екипа и млади играчи и овој плеј-оф ќе ни дојде добро за тие играчи да растат од натпревар во натпревар. Втора работа, ќе излажам ако кажам дека ние не веруваме дека ќе победиме, затоа што со сите екипи сме тука, одиме со 100% и одиме на победа, без разлика колку се поквалитетни и се поквалитетни и секој резултат што е со малку помала разлика е добар за нас. И денес бевме подготвени, малку на почеток влеговме многу лабави, малку имаше нервоза кај нас и после тоа, во соблекувалната се консолидиравме и во второто полувреме се вративме од минус три, повеќе верувавме, имавме подобра одбрана, расположен голман- Стојановски..и успеавме да победиме. Сега ни останува битка за петтото место, што ќе ни биде чекор напред за овие деца“, рече тренерот на Бутел, Горан Кузманоски.
Бутел дојде до првите бодови во плеј-офот, а како што вели Кузманоски за Спортска Мрежа сега тимот ќе цели кон петтото место во плеј-офот.
