Одбојкарките на Јанта Волеј Кисела Вода се новите шампионки во Првата женска лига, ставајќи крај на трите години доминација на Работнички Скопје! Во салата „Независна Македонија“, тимот од Кисела Вода со 3:1 (14:25, 25:23, 25:19, 25:22) ја освои третата победа во финалната серија и ја обезбеди четвртата титула во својата историја.
Иако го загубија првиот сет, избраничките на Јанта Волеј се разиграа од вториот сет натаму, направија пресврт и доминираа до самиот крај. Силниот тимски дух, одличната атмосфера и клучната поддршка од публиката беа дел од рецептoт за шампионски успех.
Најефикасни беа Мери Бошковска со 19, Ива Стојковска со 12 и Валерија Собол со 11 поени. Оваа титула доаѓа во јубилејната година од формирањето на клубот – вистинска круна за 20-годишнината на Јанта Волеј КВ!
Во редовите на Работнички Скопје, Стакхаус и Дикова освоија по 13 поени, додека капитенката Баталаковска имаше 11 поени.
