Ракометниот клуб Вардар официјално го претстави своето ново засилување за следната сезона – францускиот интернационалец Махамаду Кеита.
Искусниот 29-годишен ракометар, кој настапува на позицијата лево крило, доаѓа од шпанската АСОБАЛ лига каде моментално го носи дресот на Анхел Хименез. Кеита има богата меѓународна кариера, со настапи во три силни европски лиги – Франција, Португалија и Шпанија.
Најголемиот успех во кариерата го забележа во дресот на Бенфика, со која во 2022 година ја освои титулата во ЕХФ Лигата на Европа, победувајќи го Магдебург во големото финале. Покрај Бенфика, во својата кариера Кеита ги бранеше боите на француските екипи ЦСМ и Иври, како и на шпанските Логроњо Ла Риоха и Анхел Хименез.
Во сезоната 2022/23 како член на Логроњо, Кеита постигна импресивни 123 гола на 35 натпревари, а оваа сезона за Анхел Хименез веќе има 25 реализирани погодоци.
Со ова ангажирање, Вардар покажува јасна амбиција за создавање конкурентен тим за следната сезона, кој ќе атакува на домашната титула и успешен настап во Европа.
