Утре на теренот со вештачка трева при СРЦ „Билјанини Извори“ ќе се одигра дербито за второто место во Втората женска фудбалска лига, место кое води кон бараж за можен влез во Првата женска фудбалска лига.
Билјанини Извори и Вардар ќе се соочат во директно супер-дерби за баражот, за три бодови, за престиж – дерби на колото.
Вардар е втор на табелата со 31 бод, додека Билјанини Извори е трет со 28 бодови. Во нивниот прв меѓусебен дуел, Вардар славеше со 2:0 на домашен терен, а сега Билјанини Извори ќе се обиде да возврати на свој терен.
Предност за охридскиот тим е што, доколку го победи Вардар, ќе се израмни на табелата со ист број бодови – по 31. Ако триумфира со три гола разлика, Билјанини Извори ќе биде второпласиран, па разврската ќе се решава во последното 14. коло.
Во последното коло Билјанини Извори гостува како голем фаворит против Порече во Македонски Брод, додека Вардар ќе се соочи со уште едно дерби против Кочани на домашен терен.
Доколку Вардар загуби или одигра нерешено во Охрид, Кочани уште утре ќе стане шампион, бидејќи игра како апсолутен фаворит против Победа Валандово и речиси сигурно ќе триумфира, обезбедувајќи директен пласман во Првата лига. Во таков случај, мечот Вардар – Кочани во последното коло нема да има резултатско значење.
Билјанини Извори држи сè во свои раце во трката за второто место. Многу комбинации се можни, но утре започнува големата разврска: кој ќе обезбеди место во баражот – Билјанини Извори или Вардар?
Во Првата лига, за опстанок преку бараж ќе се борат Речица или Ас Јунајтед од Струга.
Главен судија на супер-дербито ќе биде Владимир Ѓорѓиевски од Битола, со помошници Петар Степановски и Николче Дрнковски, исто така од Битола. Контролор на натпреварот е Мендо Дивитаров од Битола.
Големото дерби започнува утре точно напладне – во 12 часот.
