Од коло во коло во секој третолигашки регион гледаме циркуси на фудбалски терен. Поголем дел од третолигашите одвај кубурат со финансии, а некои и со играчки кадар, па тоа го отвара и прашањето за трансформацијата на Трета лига, за што веќе подготвуваме емисија ексклузивно за Трета лига, наскоро повеќе детално.
Имено, екипите на Превалец и Влазними Јуниор беа слободни во рамки на 21. коло, а токму овие две екипи во следното 22. коло се среќаваат меѓусебно, па на барање на Влазними Јуниор овој меч беше одигран денес, за што Превалец прифатил.
Сепак, интересно е тоа што Влазними Јуниор на овој меч допатувал со само девет играчи, а во текот на самата игра тројца играчи се повредиле и гостинската екипа останала со шест играчи на терен, па според Правила на фудбалската игра (ПФИ) натпреварот во 22. минута бил прекинат при резултат од 4:0 за домашниот тим односно Превалец.
Хет-трик за Превалец постигна Бобан Дукадиновски, а еден гол постигна Павле Петров.
„Гостинската екипа го започна натпреварот со девет играчи, тројца од играчите се повредија па гостинската екипа остана со шест играчи во терен. По ПФИ натпреварот во 22 минута беше прекинат при резултат 4:0 во корист на домашната екипа“, се вели во записникот од натпреварот.
Не е првпат сезонава да се прекини натпревар во Трета лига поради тоа што некоја екипа остана со помалку играчи на терен, па тоа отвара сериозно прашање колку третолигашите се подготвени да ја истераат сезоната, често се случува екипи да не допатуваат на натпревар, некои веќе го откажаа понатамошното натпреварување како што е случајот со Обршани во Трета лига – Југ, а пак Марена од овој третолигашки регион и не ја започна сезоната.
Во Трета лига – Југозапад од натпреварување на полусезона се откажа Светлост од Кукуречани.
