Радовиш дојде до првата гостинска победа оваа сезона и за првпат го напушти дното на ракометната Суперлига, откако со 26:28 го совлада Прилеп во рамките на 4. коло од плеј-аутот.
Радовиш триумфираше во градот под Марковите Кули во натпревар со многу пресврти, израмнета игра и борба за секоја топка. Тимот одлично го отвори мечот со водство од 1:3, и одржуваше предност од еден до два гола, но Прилеп успеа до крајот на првото полувреме да направи пресврт и да замине на пауза со 14:13.
Во вториот дел прилепчани поведоа со 22:20, но Радовиш потоа направи серија од четири гола и поведе со 22:24. Во финишот имаше и плус три, за на крај да триумфира со 26:28, што е втор последователен триумф за тимот, кој се доближува до посакуваната цел – директен опстанок во Суперлигата.
Лазар Адамовиќ беше лидер на Радовиш со 11 голови, додека Ивица Илиев и Славе Јанковски постигнаа по пет. Во таборот на Прилеп најпрецизен беше Дениес Шабановиќ со седум погодоци.
Радовиш имаше и поддршка од своите навивачи – верните „Лебари“, кои беа присутни во Прилеп и го бодреа својот миленик на патот до првата гостинска победа оваа сезона.
Борец ФЛ и Струга ги поделија бодовите откако ремизираа со 24:24. Мечот во Велес беше вистински предизвик за двете екипи во борбата за важни бодови.
Бериша Цвитановиќ беше најпрецизен кај домаќините со седум голови, додека кај Струга се истакна Александар Стојков со десет погодоци.
Вардар, како на лесен тренинг, го совлада Тиквеш со 32:24, и ги задржа трите бодови дома. Најефикасен кај Вардар беше Петриќ со седум голови, додека за Тиквеш се истакна Гачевиќ со шест.
Во следното коло, Вардар ќе го игра големото дерби во Битола против актуелниот шампион Еурофарм Пелистер.
Убедлива победа вечерва забележа и Еурофарм Пелистер, кој во Скопје славеше над Бутел со 22:34.
Очекуваната победа на битолчани ја предводеше Дејан Манасков со шест гола, а Тајник, Борзаш и Хосни постигнаа по три. За Бутел, најпрецизни беа Дејан Михајловиќ и Димитар Узунчев со по четири гола.
