Најдобрите две екипи од регуларниот дел на сезоната, Штип УГД и Струмица 47&72, ќе се соочат во големото финале од плејофот во машката одбојкарска конкуренција. Финалната серија започнува на 25 април во Штип и ќе се игра по систем на три добиени натпревари.
Без многу неизвесност, фаворитите ги оправдаа очекувањата во полуфиналните дуели. Штип УГД убедливо го елиминира Универзитет во Тетово со две максимални победи, продолжувајќи ја својата доминација во меѓусебните натпревари сезонава. Струмица 47&72, пак, без поголем отпор, славеше на двата меча против Борец од Велес.
Овие две екипи веќе имаа финална пресметка пред две недели, кога се сретнаа во борбата за Купот на ОФМ 2025 во Радовиш. Тогаш, штипскиот колектив излезе како победник и го одбрани трофејот.
Во претстојната финална серија улогите се јасни – Струмица 47&72 ќе се обиде да го одбрани шампионскиот трофеј, додека Штип УГД ќе брка прва титула во својата историја.
