Раководството на прволигашот Пелистер соопшти дека сите средства собрани од продажбата на билетите од натпреварот против Вардар ќе бидат донирани на семејствата на трагично загинатите и повредените од големата трагедија во дискотеката во Кочани.
Цената на билетот изнесува 200 денари, а битолскиот клубот упати апел до навивачите, симпатизерите и љубителите на фудбалот да се вклучат во оваа хуманитарна акција и со своето присуство да дадат поддршка.
Натпреварот меѓу Пелистер и Вардар ќе се одигра во сабота, на 29 март, на стадионот „Петар Милошевски“ во Битола, со почеток од 15:00 часот.
„ФК Пелистер ја известува јавноста дека приходот од билетите од натпреварот Пелистер – Вардар во рамките на 25. коло ќе биде наменет за семејствата на трагично загинатите во дискотеката во Кочани. Ги повикуваме сите наши навивачи, симпатизери и љубители на фудбалот да учествуваат во оваа хуманитарна акција“, се вели во соопштението на ФК Пелистер.
Ова дерби, кое е дел од 25. коло на Првата македонска фудбалска лига (ПМФЛ), носи големо значење за Вардар, кој се бори за опстанок во лигата, додека Пелистер, кој е сигурен во средината на табелата, ќе се обиде да дојде до нова победа.
Сите останати натпревари од ова рунда се закажани за понеделник, 31. март, исто така со почеток од 15 часот.
