Последното, 22. коло од ракометната Суперлига ќе се одигра во вторник и среда, со што ќе заврши регуларниот дел од сезоната, по што следуваат натпреварите во плеј-оф и плеј-аут сегментот. Во плеј-офот ќе се разигрува за титула и излез во Европа, додека пак во плеј-аут сегментот ќе се разигрува за опстанок во ракометната елита на Македонија.
Во вторник ќе се одиграат четири натпревари. Вардар како голем фаворит ќе ја пречека Струга во меч кој ќе започне во 17:00 часот, исто како и натпреварот во Кавадарци, каде Тиквеш како голем фаворит ќе игра против Борец Ф.Л.
Во 18:00 часот Бутел на домашен терен ќе се соочи со Пролет, додека Прилеп во 19:30 часот ќе го пречека актуелниот шампион Еурофарм Пелистер, кој е апсолутен фаворит во овој дуел.
Во среда ќе се одиграат уште два натпревари. Радовиш ќе го затвори регуларниот дел со дуел против Куманово во СРЦ „25 Мај“, со почеток во 18:00 часот, а во 19:00 часот во Автокоманда ќе се одигра дербито на колото меѓу Алкалоид и Охрид.
Веќе се познати сите тимови кои ќе продолжат во плеј-офот и плеј-аутот. Во борбата за титулата во плеј-офот ќе се натпреваруваат: Еурофарм Пелистер, Алкалоид, Вардар, Охрид, Тиквеш и Бутел. Во плеј-аутот, каде ќе се води битка за опстанок, ќе играат: Пролет, Прилеп, Куманово, Борец Ф.Л., Струга и Радовиш.
Последното коло ќе биде клучно за одредување на позициите на табелата и пренесувањето на бодовите во следната фаза.
