Шаховската федерација на Македонија (ШФМ) одржа вонредно изборно собрание во хотелот „ Континентал “во Скопје, на кое присуствуваа 30 делегати со право на глас.
Собранието започна со едноминутен молк во чест на настраданите во трагедијата во Кочани. По усвојувањето на извештаите за работата на Управниот одбор и финансискиот извештај за 2024 година, се пристапи кон избор на нов претседател.
Кандидати за оваа позиција беа Воислав Мерџаноски и Оливер Деркоски. Со мнозинство од 18 гласови, за нов претседател беше избран Мерџаноски.
Мерџаноски, кој доаѓа од Гостивар, е долгогодишен шаховски работник. Тој е претседател на Шаховскиот клуб „Гостивар “, меѓународен шаховски судија и член на Управниот одбор на ШФМ. Со шах се занимава повеќе од пет децении, а бил и активен натпреварувач во повеќе циклуси. Во последниве години активно работи на популаризација на шахот меѓу најмладите.
На собранието беше избран и нов Управен одбор на ШФМ, во кој членува и гостиварецот Мирослав Кузманоски, познат шаховски активист.
Мерџаноски ја презема функцијата од Саша Богдановиќ, кој поднесе оставка една година пред истекот на неговиот мандат.
Виолета Јанчева за Спортска Мрежа
