Во рамки на 15. коло на Првата ракометна лига од група А екипата на Металург РА изненадувачки загуби од Овче Поле во Свети Николе со 30:28.
Тимот од Автокоманда имаше предност од еден гол на полувреме односно 13:14, а во вториот дел Овче Поле направи пресврт за победа.
Домашниот тим до овој триумф го водеше Александар Димитров со пет гола, а кај гостинскиот тим се истакна Филип Петровски со 17 гола, кои не беа доволни за неговиот тим да го совлада Овче Поле.
Фаворитот Еурофарм Пелистер 2 кој е прв кандидат за враќање во Суперлига со 41:14 го декласираше тимот на Астраион од Струмица. Со по шест гола се истакнаа Дамјан Наумовски и Христијан Митревси, а кај гостинот од Струмица тоа беше Христијан Ефтимов со седум гола.
Аеродром со одлично второ полувреме однесе висока победа од 34:25 над Јехона од Гостивар. Андреј Наковски беше најдобар кај ланскиот суперлигаш, а кај гостинот се истакна Адис Салиу со десет реализации, но не беа доволни за победа на неговиот тим.
Во рамки на групата Б екипата на Шампион без проблеми го декласираше „фенерџијата“ Преспа Вардар од Ресен со резултат од 33:19. За домашниот тим се истакна Стефан Огненовски со девет реализации, а пак кај гостинот од Ресен тоа беше Димитар Нечовски со шест гола.
Екипата на Младост од Богданци која сака бараж за можен влез во Суперлигата со 32:21 го декласираше тимот на Скопје на домашен терен. Победата беше најавена уште во првиот дел кога Младост имаше 16:10.
Кај домашниот тим со по пет гола се истакнаа Димитар Пеев, Борјан Цековски и Стојан Наумовски, додека пак кај Скопје Тома Симоновски имаше четири погодоци.
Македонија ЃП со 36:29 го декласираше ланскиот суперлигаш Вардар Неготино, каде за домашниот тим Бојан Божиновски постигна десет гола, а за гостинот најпрецизен беше Драган Кузманов со осум гола.
Во Гевгелија беа постигнати 68 погодоци за победа на Партизан од 35:33 против Текстилец од Штип.
Илија Пејковски го водеше домашниот тим со 13 гола, а кај Текстилец се истакнаа Филип Џинес и Јован Атанасовски со по девет гола.
