Екипите на Вардар, Струга Трим Лум, Шкендија и Брера Струмица обезбедија полуфинале од Купот на Македонија, откако денес обезбедија победи во четвртфиналето.
Немаше многу погодоци во четвртфиналето, во Радовиш со голот на Аденис Шала екипата на Шкендија од Тетово патува во следната фаза совладувајќи го второлигашот Детонит Плачковица, кој играше историско четвртфинале. Шкендија беше со втор состав, не форсираше, но радовишани одиграа одличен натпревар каде одлично се држеа против една од најквалитетните екипи во мак-фудбалот.
Шкендија имаше и пенал, кој Фитон Адеми не го реализираше, па на полувреме резултатот беше 0:1. Во вториот дел Шкендија имаше прилики и многу шанси, но домашниот голман Димитар Ѓоргиев го чуваше голот и го оставаше Детонит Плачковица во игра за израмнување, но немаше успешна завршница со сериозни шанси кон голот на Јанков.
Струга Трим Лум преку голот на Кехинде го совлада Гостивар со 1:0 и патува во следната фаза од Купот односно се пласираше во полуфиналето, каде сигурно е дека стружани ќе сакаат Куп титула и сигурен излез во Европа, откако веќе започнаа да ја губат битката за одбрана на титулата.
Вардар на Националната арена „Тодор Проески“ со минимални 1:0 славеше против Силекс и обезбеди полуфинале, со што најтрофејниот клуб ќе се бори за финале и титула во Купот. Стрелец на победничкиот гол за Вардар беше Донгмо, интернационалецот од Камерун.
Брера Струмица се намачи против второлигашот Арсими, кој играше историско четвртфинале и победникот и патникот во полуфиналето се решаваше преку пенал-рулетот.
Брера Струмица го отвори резултатот преку Нзенгуе Мубети, интернационалецот од Гамбија, а пак Арсими во вториот дел преку новото засилување Албан Таипи за 1:1 во регуларниот дел. Во пенал серијата за Брера погоди Мартин Ѓоргиевски, не беше сигурен Никола Талески, а постигнаа погодоци и Нзенгуе Мубети, Ивановски и Велков, а пак за Арсими погоди Цуцули, Малиќ Белули не реализираше како и Бесарт Реџепи, а погодија Аљбин Рамадани и Арѓен Гафури.
