Тиверија Брера, Каменица Саса и актуелниот шампион Љуботен ќе водат пролетна борба во Првата женска фудбалска лига за титулата и со тоа обезбедувањето на „виза“ за излез во Европа.
Овој викенд ќе стартува пролетната полусезона во Првата женска фудбалска лига со натпреварите од 15. коло.
Тиверија Брера е единствениот непоразен тим, тренерот Славе Велков има победнички рецепт барем кога е во прашање есенскиот дел, а сега ќе треба да го примени истиот и во пролетниот дел, ако сака конечно да ја донесе титулата во Струмица.
Неговите избранички доминираа есенва со 12 победи и само едно реми, го имаат најефикасниот напад со 68 постигнати погодоци и најдобра одбрана која примила само пет гола.
Велков ќе има тим кој е одличен на теренот во сите три зони. Викторија Панчурова е најдобриот чувар во женската фудбалска елита во есенскиот дел, дефинитивно капитенот на екипата ќе биде главен адут на голот, а секако и целиот тим кој одлично го има склопено Велков.
Тиверија Брера сега е најблиску до титула, Тчеури Харуми Гоја е во топ форма, а во пролетниот дел ќе води борба со Ана Димитровска од Каменица Саса за најдобар стрелец во лигата.
Поранешниот шампион Каменица Саса има негатива од четири бодови во однос на лидерот Тиверија Брера и повеќе од сигурно е дека овој тим од малото рударско гратче ќе води голема борба за да ја надокнади таа бодовна негатива и да застане на шампионскиот трон.
Искусната Димитровска ќе биде силен адут на тимот како најдобар стрелец, но во првото меѓусебно соочување струмичанки се подобри, откако во Македонска Каменица со 0:3 Тиверија Брера ја декласираше Саса.
Актуелниот шампион Љуботен ќе има навистина тешка задача да ја одбрани титулата бидејќи презимуваше на третото место со 31 бод или шест помалку од Тиверија Брера, што ќе биде навистина тешко да се надополни таа разлика, ако се земе предвид што тимот од Струмица е максимално мотивиран, засилен и подготвен за продолжување на тоа од есенскиот дел.
Љуботен донесе неколку странски засилувања за кои објавуваше претходно Спортска Мрежа, а со кои ќе се обиде да ја зголеми конкуренцијата во своите редови.
Во секој случај ќе гледаме неизвесна и израмнета борба за титулата.
Во рамки на првото пролетно коло Тиверија Брера походот кон титулата го стартува од Пржино каде ќе се соочи со Истатов во меч каде струмичанки ќе бидат фаворити. Шампионот Љуботен како голем фаворит патува во Битола каде ќе игра против Топ Гол.
Екипата на Речица која ќе води борба да го избегне деветтото место односно да не игра бараж и да има директен опстанок на свој терен ќе игра со струшки Ас Јунајтед.
Каменица Саса на домашен терен ќе има незгоден противник во Македонска Каменица ќе гостува битолски Атлетико, кој е засилен со неколку квалитетни фудбалерки, меѓу нив најзвучно име во тимот на Никола Гелевски е искусната Анита Гоцевска.
Во рамки на првото пролетно коло екипата на Скопје ќе биде слободна.
Колку за потсетување од Првата женска фудбалска лига нема да има директно испаѓање, бидејќи пред почетокот на сезоната се откажа Шкендија од Тетово и таа екипа е формално на десетто место, а борбата ќе биде бегство од деветтото место кое води во баражот за можен опстанок, а кој бараж се игра против второпласираната екипа од Втората лига.
