Во сабота во Куманово ќе се игра големото дерби меѓу Башкими и Арсими во битката за директен влез во Првата македонска фудбалска лига. Двете екипи кои имаат амбиции за влез во елитата, во сабота, а во рамки на 18. коло ќе се соочат во меѓусебен дуел.
Башкими во првото пролетно коло „киксна“ со Борец откако одигра 1:1, а пак во претходното коло го доби лидерот Македонија ЃП со 0:1. Од друга страна пак Арсими тргна со победа во Струмица против Беласица со 0:1, а во претходното коло „киксна“ играјќи 1:1 против Охрид на домашен терен.
Интересно е тоа што и Брегалница која е нивен конкурент исто така имаше „кикс“ играјќи нула во Прилеп против Победа, а во претходното коло го доби Новаци со 3:1 на домашен терен. Ова значи дека трите екипи кои се конкуренти за второто место кое директно води кон Прва лига, имаат идентичен учинок во пролетниот дел.
Натпреварот е од капитално значење и за двете екипи. Башкими со триумф има можност да избие на второто место, но притоа да се надева на „кикс“ на Брегалница од реми или пораз против Саса во Турново, а пак од друга страна тоа за Арсими ќе значи шанси можеби само за бараж, бидејќи Башкими значително ќе побегне во однос на Арсими.
Од друга страна Арсими со победа ќе се израмни на третото место со по 36 бодови со Башкими, а притоа во таква ситуација Брегалница може да добие најмногу ако победи против Саса, бидејќи Башкими и Арсими ќе имаат по 36 бодови за делба на третото место, а Брегалница би била втора со 40 бодови.
Многу комбинации, многу математики, а трите бодови се императив и за двете екипи.
Двете екипи имаат по неколку квалитетни засилувања, но и заминувања, а Алпај Јусуф од Башкими премина во редовите на Арсими.
Во секој случај пред нас ќе биде вистинско дерби каде ќе има голема броба на теренот и каде трите бодови се повеќе од императив и на двете страни за триумф.
