Овој викенд започнува пролетната полусезона во Втората женска фудбалска лига, а во рамки на осмото коло или првата пролетна рунда, екипата на Плачковица на домашен терен ќе игра против Вардар, во меч каде гостинскиот тим ќе ја има улогата на фаворит.
Вардар е втор на табелата и ќе води борба за сочувување на второто место со цел да го повтори ланскиот успех и одново да игра во баражот за можен влез во Првата женска фудбалска лига, откако минатата сезона убедливо загуби во баражот од прволигашот Топ Гол од Битола.
Есенскиот шампион Кочани на домашен терен ќе се соочи со Билјанини Извори. Кочани е прв фаворит за потврда на првото место и со тоа да се врати по неколку години во Првата лига, а пак Билјанини Извори е значително засилен, каде ќе води борба со Вардар за второто место и за баражот преку кој охридскиот тим ќе се бори за враќање во Првата лига.
Во Велес соочување на „фенеријата“ Борец кој има минус два бодови, откако три бода му беа одземени, а сега ќе игра против Победа Валандово, каде тимот од Валандово ќе биде фаворит против велешкиот тим за второ сезонско славје.
Во Македонски Брод ќе се соочат Порече и дебитантот Слободен, каде домаќинот ќе ја бара третата сезонска победа и да го напаѓа четвртото место каде што е радовишка Плачковица, а пак Слободен ќе ја бара првата исторски победа како второлигаш.
