Голманот Кевин Заов со 16 години, четири месеци и 25 дена е меѓу најмладите голмани во Македонија, кој дебитирал во сениорскиот фудбал.
Кочанчанецот кој потекнува од фудбалската школа Атлетико 2021, на вчерашниот меч од 16. коло на Втората македонска фудбалска лига, како голманот на Брегалница, го имаше своето деби во сениорскиот фубдал.
За Заов ова е прв натпревар во сениорскиот фудбал, кој на вчерашниот меч против Победа успеа да ја сочува мрежата чиста, во натпревар кој заврши без погодоци и без победник (0:0).
Младиот голман кој успешно го чува голот на Брегалница во младинската Суперлига како и во пионерската Суперлига, вчера го забележа својот прв настап за штипскиот второлигаш во сениорска конкуренција.
Да се дебитира на 16 години за прв тим како голман е голем момент во кариерата на еден млад голман, превземајќи голема одговорност, пред се затоа што Брегалница води борба за враќање во Првата лига.
Првиот голман на тимот, Дамјан Серафимов го пропушти вчерашниот меч поради жолти картони, па тоа беше шанса за Заов да застане меѓу стативите и да го чува голот на Брегалница.
