Спортска Мрежа од „Билјанини Извори“
Спортската сала „Билјанини Извори“ вечерва беше исполнета до последното седиште, во неверојатна атмосфера, со одлична навивачка атмосфера, шампионот Еурофарм Пелистер „преживеа“ и ја доби драмата со Охрид, во меч кој заврши со резултат од 25:27.
Охриѓани покажаа дека може да се носат и да бидат конкурентни за третото место во Суперлигата, а и во анализите на Спортска Мрежа изминатиот период потенциравме дека во плеј-офот титулата може да биде решена токму во „Билјанини Извори“.
Во вистинско ракометно македонско дерби целиот натпревар беше неизвесен, се играше гол за гол, а во првиот дел битолчани на полувреме имаа плус три за 13:16. Во вториот дел беше вистинска драма, каде Охрид дојде и на минус еден во неколку наврати, што ја вжешти атмосферата во салата, но на крај Еурофарм Пелистер успеа да се извлече со тоа што мечот го доби со тесни 25:27.
Теимураз Орјоникидзе со шест реализации беше најдобар кај Охрид, а кај Еурофарм Пелистер тоа беше Усама Хосни со седум голови.
