Денес во рамки на 18. коло од ракометната Суперлига, Куманово на домашен терен ќе се соочи со фаворитот Пролет.
За Куманово ова ќе биде прв домашен натпревар во пролетниот дел, откако клубот во претходното коло во БИтола беше поразен од шампионот Еурофарм Пелистер.
Тренерот на Куманово, Љубиша Димковски, вели дека Пролет е квалитетна екипа и ја препушаат фаворитската улога на страната на противникот, но додава дека ќе атакуваат на триумф со цел да ја израдуваат домашната публика.
„Оваа екипа на МРК Куманово дефинитивно поседува квалитет и сум сигурен во тоа. Иако во Битола минатиот викенд бевме поразени , морам да кажам дека одигравме добар меч и сигурен сум во иднина ќе го покажеме тоа и на теренот.
РК Пролет е квалитетна екипа со која ќе се сретнеме на домашен терен и покрај тоа што ја оставаме фаворитската улога на нивна страна , ние како тим ќе направиме се да дојдеме до триумф и да ја израдуваме домашната публика и кумановската спортска јавност. Уште еднаш ги повикувам сите љубители на ракометот да дојдат во недела најпрво да го поздрават нашиот тим и новите играчи кои пристигнаа во зимскиот преоден рок, а потоа како и што досега навивале и не бодреле повторно да покажат дека се нашиот плус играч на мечот“, изјави шефот на стручниот штаб на МРК Куманово, Љубиша Димковски.
Куманово ќе разигрува во плеј-аутот, а исто го очекува и Пролет.
Натпреварот меѓу Куманово и Пролет се игра денес во Спортската сала „Перо Наков“ со почеток од 17 часот. Судиска двојќа ќе бидат нашите најдобри судии Ѓорѓи Начевски и Славе Николов од Скопје, а пак делегат на мечот ќе биде Ацо Николовски, исто така од Скопје.
