Третолигашот Влазерими денес во Кичево го одработи првиот тренинг и со тоа означи старт на зимските подготовки за вториот дел од сезоната.
Тимот има јасна цел за пролетниот дел – по третпат да стане шампион и од трет обид да триумфира во баражот и со тоа да обезбеди влез во Втората лига.
Влазерими две години по ред е шампион во Трета лига – Запад, но не ги поминува баражите, пред две сезони загуби од Башкими, а лани од Борец.
За таа цел Влазерими ангажираше девет нови засилувања, како што информираше Спортска Мрежа, нови играчи се Ресул Рамадани, Агон Хајредини, Христијан Крклински, Иве Трифуновски, Насаф Шабанов, Сами Аљиљи, Ариф Садики, Егзон Османи и Арбен Бајрами.
Влазерими е втор на табелата со еден бод помалку во однос на лидерот Тетекс, но „штофарите“ од Тетово имаат меч повеќе во однос на тимот од Кичево, а интересно е тоа што во првото пролетно коло двете екипи ќе се соочат меѓусебно.
