Денес ракометарите на Охрид забележаа висока победа на пријателски меч против Куманово, а на овој меч новото засилување на охриѓани, Бразилецот Де Соуза Мораис Каио Винициус настапуваше против својот поранешен клуб, Куманово, откако во овој зимски преоден рок тој го замени дресот на Куманово со тој на Охрид.
Спортска Мрежа разговараше со Винициус после натпреварот, му посакавме добредојде на новиот десен бек во ГРК Охрид, Де Соуза Мораис Каио Винициус, и го прашавме колку е задоволен од новиот клуб, условите, соиграчите, од неговиот нов „дом“ и за тоа што го очекува во наредниов период?
„Имам добар впечаток за клубот, Охрид има многу добри играчи, исто така има добри услови за мене, одлични тренери, пријателски настроени соиграчи, и мислам дека тоа е супер. Всушност, и во Куманово имав добри услови, тренери и многу пријатели, меѓутоа Охрид е поголем клуб, подобар на табелата во Суперлигата, четврто место моментално, па тука гледам можност за мене да напредувам и еволуирам во уште подобар играч. Се надевам дека ќе имаме многу заеднички успеси во остатокот од сезоната“, рече Винициус во ексклузивна изјава за Спортска Мрежа.
Охрид ќе одигра уште еден пријателски меч против Вардар, пред почетокот на пролетниот дел од Суперлигата, кој го отвара во Велес против дебитантот Бисинов.
Сања Секулоска, Спортска Мрежа
