Екипата на Влазерими од Кичево за пролетниот дел од сезоната каде ќе води борба по третпат да стане шампион и по третпат да игра бараж за Втора лига се засили со Насаф Шабанов и Агон Хајредини.
25-годишниот Шабанов доаѓа од редовите на второлигашот Новаци, а низ својата кариера беше дел од некогашните второлигаши Локомотива од Градско и Братство од Житоше, Плачковица, Вардар Неготино Превалец и Беласица, Шабанов имаше авантури во Хрватска и Германија.
24-годишниот Хајредини во Влазерими доаѓа од струшки Караорман, а претходно беше дел од Воска Спот, Слога Виница, Велешта, Струга, Дрита од Боговиње, Шкендија и Караорман од каде и потекнува.
Влазерими е втор на табелата во Трета лига – Запад со четири бода негатива во однос на лидерот Тетекс, со тоа што „штофарите“ имаат меч повеќе одиграно, а двете екипи ќе се соочат меѓусебно во првото пролетно коло.
