Новајлијата во Трета лига – Југозапад, екипата на Евротип, за пролетниот дел промовираше три нови засилувања, со кои тимот ќе се обиде сезоната да ја заврши со висок пласман на третолигашката табела.
Битолскиот тим ги промовираше напаѓачот Антонио Марцевски, Петар Цфетко со кој се засилува средниот ред и Иванчо Јовановски кој исто така ја засилува третата зона односно нападот. Тројцата играчи во пакет доаѓаат од третолигашот Кравари.
Марцевски е 19-годишен фудбалер, кој потекнува од школата Форца Спорт од Битола, а има настапувано и во младинските погони на Пелистер. Цфетко, исто така има 19 години и ќе биде освежување во тимот на Евротип.
Јовановски, исто така има 19 години, потекнува од школата на Пелистер, а во Евротип доаѓа од Кравари има настапувано во младинските категории и на битолски Топ Гол како и на Форца Спорт.
ДОБИВАЈ СПОРТСКИ ВЕСТИ НА ВИБЕР
Во Третата лига Југозапад ќе биде доста неизвесно за борбата за првата позиција, која води кон баражот за влез во Втора лига, а таа пролетна борба ќе ја водат лидерот Преспа од Ресен, Кораби од Дебар и Сатеска од Волино. Битолскиот тим презимува на 5. место на табелата со 16 бодови и има учинок од пет победи, едно реми и пет порази. Во првото коло од пролетниот дел Евротип ќе гостува кај екипата на Кравари.
