Амбициозниот третолигаш Шкендија Арачиново продолжува со засилувањето на тимот, а новото име во редовите на клубот е 23-годишниот Иса Абдулахи. Овој фудбалер, кој има албанско државјанство, пристигнува од Динамо Тирана и ќе биде клучен елемент во играта на есенскиот шампион на Трета лига – Север.
Иса Абдулахи својата кариера ја започнал во академијата на Торонто, а потоа се приклучил на младинските погони на Партизани од Тирана. Познат по својата флексибилност на теренот, Абдулахи игра како крилен и дефанзивен играч за врска, што ќе му овозможи да донесе нова димензија во играта на Шкендија Арачиново.
Клубот од Арачиново, кој има осум бодови предност во однос на второпласираната Фортуна во Трета лига – Север, исто така објави и заминувања на неколку играчи, меѓу кои се Адем Саиди, Илир Сула, Фатмир Арифи и Адем Емини. Претходно, клубот се раздели и со Емир Алиу. Но, за да го засили тимот, Шкендија Арачиново ги доведе Фиктер Љиварека, Ертан Демири, Мргим Дани и Бесир Бафтијар.
Сите очи се вперени во претстојниот пролетен дел од сезоната, кога Шкендија Арачиново со голема веројатност ќе го потврди првото место и ќе ја обезбеди својата шанса за влез во Втора лига преку бараж.
