21-годишниот напаѓач Албан Таипи, кој досега беше дел од второлигашот Детонит Плачковица, кариерата ќе ја продолжи во редовите на Арсими. Таипи во тимот од Радовиш мина само една полусезона, по што се реши за нов предизвик и трансфер во клубот од Чегране.
Пред да го носи дресот на Детонит Плачковица, Таипи настапуваше за Беса од Добри Дол, а својата фудбалска кариера ја започна во Ренова, по што играше и за неколку клубови во Унгарија.
Со трансферот на Таипи, Арсими дополнително ја засили својата екипа, која претходно ги ангажираше Алпај Јусуф, Стојан Стојчевски и Малиќ Белули. Тимот од Чегране моментално се наоѓа на 4. место на табелата со 29 бодови и амбициозно влегува во пролетниот дел од сезоната со цел да избори пласман во Првата лига.
Арсими пролетната полусезона ќе ја отвори со гостување во Струмица против Беласица, во натпревар кој ќе биде значаен за амбициите на тимот.
