ФК Кожуф ќе ја започне пролетната полусезона од Втората македонска лига со нов тренер, откако клубот и досегашниот шеф на стручниот штаб, Филип Деспотовски, ги разделија своите патишта. Деспотовски, кој со љубов и посветеност ја извршуваше својата функција, се огласи со официјална изјава во која се осврна на своето искуство со клубот.
„Со љубов ја извршував функцијата шеф на стручен штаб на ФК Кожуф. Го сакам фудбалот како играч во минатото и сега како тренер и од тие позиции им ја пренесов мојата љубов и знаење на многу млади играчи од младинската школа на ФК Кожуф. Им дадов шанса да го искусат натпреварувачкиот дух и да добијат место во првиот тим. Од мене се очекуваше да го однесам и задржам клубот на средината на табелата во склад со условите и можностите кои беа понудени. На играчите им посакувам успеси во наредната сезона,“ изјави Деспотовски.
Раководството на клубот во моментов активно работи на пронаоѓање нов стратег кој ќе ја предводи екипата во пролетниот дел од сезоната. Преговорите со потенцијални кандидати се во тек, а во наредниот период се очекува официјално претставување на новиот тренер.
ФК Кожуф ја заврши есенската полусезона на делба на осмото место на табелата, со 22 освоени бодови, исто како и екипата на Скопје. Тимот ќе го започне пролетниот дел од сезоната со гостување во Македонска Каменица, каде што на 15 февруари ќе се соочи со домашната екипа на Саса.
