Струмичкиот второлигаш Беласица на 9. јануари ќе ги започне подготовките за пролетната полусезона.
Шефот на стручниот штаб Александар Стојанов на 9. јануари ќе ја има првата прозивка со играчите, а во рамки на зимските подготовки екипата ќе одигра шест пријателски натпревари. Првиот дуел е закажан за 17. јануари во Струмица против тетовскиот прволигаш Шкендија. Потоа, на 22. јануари Беласица ќе се соочи со Вардар Неготино, на 25. јануари со Детонит Плачковица, а на 28. јануари ќе одигра пријателски натпревар со Струмска Слава од Бугарија. На 1. февруари е закажан дуелот со Кожуф, додека последниот тест ќе биде на 8. февруари против Септември Симитли од Бугарија.
Беласица есенскиот дел го заврши на 10. место на табелата со 19 бодови на своето конто и ќе се обиде со квалитетна подготовка да го подобри својот пласман во пролетниот дел од сезоната.
