По успешните настапи во Европскиот Куп на ЕХФ и пласманот во третото коло, ракометарите на ГРК Охрид се враќаат на обврските во домашното првенство. Во рамките на осмото коло од Супер лигата, „гладијаторите“ ќе го пречекаат тимот на Еурофарм Пелистер 2, во дуел во кој ќе атакуваат на нови бодови.
Охриѓани ја имаат фаворитската улога, но свесни се дека тоа треба да го потврдат на теренот. Голманот Бојан Блажески најавува максимален пристап и јасна цел – продолжување на победничкиот ритам во домашниот шампионат.
„Ни следи натпревар со екипата на Еурофарм Пелистер 2. Фаворитската улога мораме да ја оправдаме на терен и да оствариме нова победа во домашното првенство“, порача Бојан Блажески.
Натпреварот меѓу ГРК Охрид и Еурофарм Пелистер 2 ќе се одигра утре, во вторник, со почеток во 19:00 часот, во салата „Билјанини Извори“. По европските предизвици, „гладијаторите“ повторно ќе ја имаат поддршката од домашната публика, со желба со нов триумф да ги израдуваат охриѓани и да продолжат со добрите резултати на двата фронта.
