ГРК Охрид влегува во месецот со еден од најгустите натпреварувачки распореди во досегашниот дел од сезоната. Охриѓани во октомври ги очекуваат дури шест натпревари, а календарот носи и европски предизвици и важни пресметки во Супер лигата.
Маратонската серија започнува на 3 октомври, кога „гладијаторите“ гостуваат кај актуелниот шампион Вардар во рамките на 5. коло од Супер лигата. Само седум дена подоцна, на 10 октомври, Охрид ќе биде домаќин на Алкалоид во „Билјанини извори“.
По домашниот првенствен натпревар следува првиот европски предизвик. На 23 октомври Охрид ќе го пречека Спор Тото во „Билјанини извори“ во рамките на второто коло од ЕХФ Европскиот Куп, а само еден ден подоцна е закажан и вториот дуел со турскиот претставник.
Распоредот не им остава многу простор за одмор на охриѓани, бидејќи веќе на 27 октомври повторно ги очекува првенствена обврска. Во „Билјанини извори“ гостува Еурофарм Пелистер во натпревар од 8. коло на Супер лигата.
Октомврискиот циклус ќе биде затворен на 31 октомври со гостување кај Куманово во салата „Перо Наков“, во рамките на 9. коло.
Така, Охрид го очекува месец исполнет со сериозни предизвици, со шест натпревари во нешто помалку од четири недели. Покрај домашното првенство, „гладијаторите“ ќе имаат и двоен европски тест против Спор Тото, па октомври ќе биде вистински испит за тимот од „Охридската ракометна тврдина“.
