Октомври носи вистински ракометен маратон за Вардар 1961. „Црвено-црните“ ги очекува исклучително густ распоред во кој ќе одиграат дури осум натпревари, а календарот е исполнет со серија сериозни предизвици и на домашна и на европска сцена.
Серијата започнува на 3 октомври со големото дерби против Охрид во СЦ „Јане Сандански“, а веднаш потоа следува европскиот предизвик против Висла Плоцк. Полскиот тим гостува во Скопје на 8 октомври во рамките на Лигата на шампионите, со почеток од 20:45 часот.
По европската пресметка, Вардар продолжува со домашните обврски. На 11 октомври следува гостување кај Струга, а само три дена подоцна „црвено-црните“ повторно ќе се соочат со Висла Плоцк, овојпат во Полска.
Но тука не завршува приказната. На 18 октомври Вардар ќе го пречека Бутел, по што повторно следува Лигата на шампионите и гостувањето кај Нант на 21 октомври. ЕХФ го има закажано овој натпревар за 20:45 часот.
Последната недела од месецот носи уште два натпревари. На 25 октомври Вардар ќе гостува кај Прилеп, додека октомврискиот маратон ќе биде затворен со уште еден европски спектакл — на 28 октомври во СЦ „Јане Сандански“ ќе пристигне германскиот Мелсунген.
Така, во само 26 дена Вардар ќе има осум натпревари, од кои четири во домашното првенство и четири во Лигата на шампионите. Особено впечатлив е фактот што „црвено-црните“ во октомври ќе се соочат со европски ривали како Висла Плоцк, Нант и Мелсунген, во период исполнет со натпревари речиси секоја недела.
