Македонската репрезентација до 17 години одигра 1:1 против соодветната селекција на Луксембург во вториот контролен натпревар меѓу двете репрезентации, одигран на тренинг-центарот „Пандев“ во Струмица.
Првото полувреме помина во мирна и израмнета игра, со почетно одмерување на силите и без поголеми возбудувања пред двата гола. На паузата се замина со почетните 0:0.
Во вториот дел ритамот на играта се подигна, а Македонија беше поблиску до погодок. Најголемата можност за нашата селекција ја имаше Марин Крстевски во 80. минута, но не успеа да ја затресе мрежата.
Казната за пропуштената шанса стигна во самиот финиш. Луксембург во 89. минута успеа да поведе со 0:1 и се чинеше дека ќе ја однесе победата.
Сепак, младите „рисови“ не се предадоа и веднаш возвратија. Во 91. минута, по одлично нафрлена топка во шеснаесетникот на Луксембург, Илија Аксентиев беше највисок во скокот и со прецизен удар со глава го постигна израмнувачкиот гол за конечни 1:1.
Селекторот Иљами Исејни на стартот се одлучи за комбиниран состав, со оглед на тоа што шанса добија фудбалерите кои беа на резервната клупа на првиот меѓусебен дуел. Македонија на првиот натпревар славеше убедливо со 4:1, а во вториот дел Исејни им даде минутажа и на останатите репрезентативци.
Двата контролни натпревари против Луксембург беа добра можност за селекторот Исејни да ги провери сите расположливи фудбалери и да им даде шанса на поголем број репрезентативци.
Македонија до 17 години: 12. Димитар Петров, 3. Михајло Павлов, 4. Стефан Стефаноски, 10. Павел Стојанов, 13. Леарт Исеини, 14. Ејсер Фетаи, 17. Огнен Сивевски, 18. Рон Мемеди, 20. Боби Недановски, 23. Благоја Седлоски, 24. Огнен Јаков;
1. Илан Мемети, 22. Петар Талески, 2. Адриан Велески, 5. Матеја Масев, 6. Амар Акики, 7 Александар Полимац, 8 Дардан Адеми, 11 Марин Крстевски, 15 Илија Аксентиев, 16 Матеј Николов, 19 Далибор Марковиќ, 21 Аулон Куртиши;
Луксембург до 17 години: 12. Фабрис Хилбш, 4. Саша Брушел, 6. Вандир Фигеиредо, 7. Диего Монтеиро, 8. Дилан Рамчиловиќ, 11. Антенори Машадо, 14. Идсон Фигеиредо, 15. Лука Танканен, 16. Диего Милило, 19. Фарел Мехлингер, 20. Харолд Чуечанг;
1. Рин Осарио, 2. Натан Оро, 3. Мак Мемиќ, 5. Хенри Дереса, 9. Адин Такалиќ, 10. Доминико Руџерио, 13. Тино Буџеја, 17. Јан Рибеиро, 18. Џамин Гонсалвеш;
