Еурофарм Пелистер не успеа со позитивен резултат да ја започне европската сезона, откако на домашен терен претрпе убедлив пораз од Ла Риоха со 24-31.
Шпанскиот состав уште од самиот почеток наметна ритам кој домашниот тим не успеа да го следи. Ла Риоха поведе со 5-0, а пелистерци долго чекаа на својот прв погодок. Наместо да се доближи до противникот, Еурофарм Пелистер продолжи да се мачи во нападот, па гостите постепено ја зголемуваа предноста.
На полувремето шпанскиот тим замина со +8, при резултат 8-16, а сличната слика продолжи и по паузата. Ла Риоха во вториот дел без поголеми проблеми го контролираше резултатот, а во еден момент стигна и до двоцифрена предност.
Главниот фактор во победата на гостите беше Хоан Ледо, кој одигра фантастичен натпревар меѓу стативите. Голманот на Ла Риоха со своите интервенции им создаваше огромни проблеми на пелистерци, а мечот го заврши со 21 одбрана од 45 удари. Покрај тоа, трипати успеа да погоди и од својот гол во празната мрежа на домаќинот.
Пелистер во финишот се обиде барем да ја намали разликата и со серија од 4-1 стигна до 21-29, но немаше доволно време за посериозен камбек. Ла Риоха рутински ја доврши средбата и дојде до значајни бодови од Битола.
Алваро Мартинез беше најефикасен кај победничкиот состав со шест гола, додека Да Силва Оливеира, Рамос, Д’Антино и Мартинез постигнаа по четири. Во редовите на Еурофарм Пелистер, Петар Атанасијевиќ и Самоил Ристевски запишаа по четири погодоци, а Кајалџиески три.
Поразот има дополнителна тежина бидејќи и Гдањск приреди изненадување во првото коло со победа на гостувањето кај Гумерсбах. Токму полскиот тим ќе биде следниот противник на пелистерци, кои на 6 октомври ќе гостуваат во Полска во второто коло од Европската лига.
