Второлигашот Еуромилк ГЛ го претстави Љупчо Димовски како нов тренер, кој доаѓа на местото на Јован Трајков, кој поднесе оставка пред шестото коло.
Димовски има големо тренерско искуство, во минатото ги водеше Вардар, Металург, Балкан, Скопје, Кожуф, Тетекс и Хоризонт Турново, а меѓународна кариера градеше во Грција, каде беше дел од Касторија, Јанина, Кавала, Пиерикос и Трикала.
Како голман, Димовски настапувал за повеќе реномирани македонски клубови, меѓу кои Вардар, Металург, Тетекс, Победа, Беласица и Работнички.
„Веруваме дека неговото огромно искуство, знаење и професионален однос ќе донесат дополнителен квалитет во работата на екипата и ќе бидат голем придонес за ФК Еуромилк ГЛ во продолжението од сезоната. Му посакуваме многу успех, добри резултати и добредојде во Еуромилк! Заедно продолжуваме храбро кон новите предизвици! Воедно, упатуваме голема благодарност до досегашниот шеф на стручниот штаб Јован Трајков за досегашната работа, посветеност и придонес во развојот на клубот. Му посакуваме многу успех во понатамошната кариера“, веат од ФК Еуромилк ГЛ.
По шест кола популарните „лисици“ кои по долги години се вратија во Втора лига имаат една победа, едно реми и четири порази и со четири бодови се наоѓаат во опасната зона односно на 12. место.
Димовски своето деби на клупата на Еуромилк ГЛ ќе го има во рамките на 7. коло, кога „лисиците“ ќе гостуваат во Кочани кај Осогово.
