ГРК Охрид го очекува нов голем предизвик во Супер лигата, а во рамки на 5. коло „гладијаторите“ ќе гостуваат кај Вардар. Охриѓани влегуваат во дербито со амбиција да продолжат со добрите настапи и од Скопје да се вратат со полн плен.
Предводникот на Охрид, Доминик Мате, очекува тежок и неизвесен натпревар, но верува дека екипата има доволно време за квалитетно да се подготви за големото дерби. Мате потенцира дека и двете екипи се во добра форма, но јасно ја истакнува целта на охриѓани пред гостувањето во „Јане Сандански“.
„Очекувам тежок меч, двете екипи се во добра форма. Вардар има добар тим, но ние имаме една недела добро да се подготвиме за натпреварот и одиме во Скопје по два бода.“- изјави Мате.
Охрид и Вардар ќе се сретнат во сабота, 3 октомври, со почеток во 19:00 часот во СЦ „Јане Сандански“. По досегашните пресметки во новата сезона, ова ќе биде уште една голема битка меѓу двата тима, овојпат за суперлигашки бодови.
„Гладијаторите“ знаат што ги очекува во Скопје, а Мате и соиграчите најавуваат јасна цел – Охрид да се врати дома со двата бода.
