Нов голем ракометен дуел е закажан во Супер лигата, каде што Вардар и Охрид ќе ги одмерат силите во рамки на петтото коло. Дербито ќе се одигра на 3 октомври во СЦ „Јане Сандански“, а почетокот е закажан за 19:00 часот.
Битката меѓу двата тима ќе биде воедно и нивна четврта пресметка од стартот на новата сезона. Досега Вардар и Охрид се сретнаа на завршниците на турнирите во Струга и Охрид, а потоа следуваше и официјалниот дуел во Супер Купот на Македонија.
Интересот за претстојното дерби веќе е присутен, па билетите се пуштени во продажба и може да се обезбедат онлајн. Цената зависи од позицијата на трибините, односно билетите се достапни по 300, 400 и 500 денари.
По турнирските пресметки и битката за првиот трофеј во сезоната, Вардар и Охрид повторно ќе се сретнат, овојпат во борбата за суперлигашки бодови.
