Одбојкарскиот шампион на Македонија, Штип УГД, продолжува со подготовките за новата сезона, а во рамки на подготвителниот период одигра два контролни натпревари против косовскиот ОК Феризај.
Штипјани во двата дена одиграа по четири тренинг-сета, со цел воигрување на составот и постепено темпирање на формата пред стартот на новата сезона. Првиот натпревар, одигран на гостински терен, заврши со 2:2, додека денес во новиот дом – СЦ „Џексон“ – Штип УГД славеше со 3:1.
Резултатот во овие средби беше во втор план, а фокусот беше ставен на тактичките замисли, воигрувањето и подигнувањето на натпреварувачкиот ритам.
За Штип УГД претстои сезона во која клубот ќе има големи предизвици. Штипјани минатата сезона ја испишаа клупската историја, освојувајќи ја првата шампионска титула на Македонија, а третпат во низа го кренаа и Купот на Македонија, со што за првпат во својата историја стигнаа до двојна круна.
Екипата предводена од крушевскиот стратег Кристијан Ристески сега се подготвува за обид да ги одбрани двата трофеи, но и за историскиот европски предизвик.
Штип УГД за првпат ќе настапи во Лигата на шампионите, каде во дебитантскиот настап ќе се соочи со шампионот на Холандија, Орион Старс.
Со тоа, двата натпревари против Феризај се само дел од подготовките на македонскиот шампион пред сезоната во која штипскиот клуб ќе има можност повторно да се бори за домашните трофеи, но и за првпат да се претстави на најголемата европска одбојкарска сцена.
