Македонскиот шампион Вардар 1961 продолжува со максимален учинок во ракометната Суперлига. „Црвено-црните“ славеа на гостувањето кај ГРК Тиквеш со 35:27, во натпревар од четвртото коло во Суперлигата.
Кавадарчани имаа добар старт и во воведниот дел успеваа да му парираат на фаворизираниот гостин, но Вардар постепено ја презеде контролата врз натпреварот. На полувремето скопскиот состав имаше предност од 18:14.
Тиквеш не се предаде и во вториот дел успеа да се доближи на само еден гол негатива, но Вардар брзо одговори со серија погодоци и повторно се одлепи, по што рутински го приведе натпреварот до крај.
Матео Фадуил со седум гола беше најефикасен кај Вардар, додека Леон Љевар постигна шест. Голманот Милош Валах имаше одлична партија со 11 одбрани. Кај домашните, Тоше Ончев постигна шест, а Мохамед Азиз пет гола.
Вардар со новите бодови продолжува со максимален ефект, а во следното коло го очекува големото дерби против Охрид на домашен терен.
