Вистински фудбалски празник донесе третото коло на Трета лига регион 4 во Пепелиште, откако се соочија Победа и ланскиот второлигаш Вардар Неготино, во меч каде беа постигнати два погодоци, но немаше победник, двете екипи ремизираа играјќи 1:1 и ги поделија бодовите.
Клубот од Пепелиште е новајлија во ТМФЛ регион 4, а кога Победа игра на домашен терен, тогаш тоа е фудбалски празник за самото село. Многу публика, дружба и следење на третолигашки фудбал.
Управата на клубот, но и сите кои во изминатиот период помагаа се вистински херои – со многу љубов, желба и труд го вратија во одлична кондиција фудбалскиот терен, уредени соблекувални, уреден терен, ограда и слично, третолигашкиот фудбал се врати во Пепелиште.
Натпреварот за кој веќе Спортска Мрежа објави извештај меѓу Победа и Вардар Неготино направи вистинско фудбалско уживање за цела општина. Од најмал до највозрасен секој го следеше натпреварот.
Се бараше место повеќе каде да се остави автомобилот, радоста и среќата се гледаше кај секој кој беше на стадионот, а за публиката може само да се каже дека беше во број, каков што нема ниту на прволигашки натпревари.
