Алкалоид продолжува со максимален ефект во Суперлигата. Тимот на Кирил Лазаров ја запиша четвртата победа во исто толку натпревари, откако на гостувањето во Богданци го совлада Младост со 24-32, во преполната сала „Млаз“.
Домашниот состав имаше голема поддршка од трибините, но Алкалоид уште од воведните минути го наметнуваше своето темпо во натпреварот, ја диктираше играта и постепено ја градеше предноста.
Младост се обидуваше да остане во натпреварот и да му парира на фаворизираниот противник, но квалитетот и искуството беа на страната на тимот од Автокоманда. Во вториот дел Алкалоид дополнително ја зголеми разликата, а со дисциплинирана игра во продолжението без поголеми проблеми стигна до нови два бода.
Урош Борзаш беше најефикасен кај победничкиот состав со пет гола, додека Владимир Бојаниќ со седум погодоци беше прв стрелец на Младост.
За богданчани, сепак, следува период во кој ќе имаат можност да стигнат до првата сезонска победа. По трите порази и едното реми на стартот, Младост го очекуваат три важни натпревари – гостување кај Мулти Есенс во Автокоманда, домашен дуел со Еурофарм Пелистер 2 и гостување кај Куманово.
По серијата тешки предизвици, токму овие натпревари ќе бидат можност за тимот на Горан Андоновски да дојде до бодови и да ја запише првата победа во новата сезона.
